最新民意調查顯示曾特首民望跌至44%，歷來最低，梁振英民望升到54%，創新高，最近兩件事情對兩人民望係有影響嘅，一件係梁振英喝停2013年雙非孕婦配額，一件係曾特首外訪巴西，住酒店總統套房，大家都知邊件事係正面影響，邊件係負面影響，唔駛講到明。呢個世界有好多巧合事情，前一次，選舉前爆出西九利益衝突疑案之後，就立即有曾特首「款待門」見報；呢一次在陳冉「種人」疑案之後，立即有曾特首「酒店門」，搞到曾特首灰頭土臉，梁先生輕鬆過關，如果要追查巧合原因，大概曾先生亦要檢討佢自己身邊嘅人是否睇唔過眼佢缺乏政治敏感度，仲以為今天仍然係港英年代，故此報界特別消息靈通。
過往港英年代，好似冇人走港督咇，專揭港督秘聞嘅噃，老波骨記者就話俾左丁山聽，以前新聞報道就住就住，冇今日咁冇王管，咁鬼自由嘅，亦因如此，千祈唔好以為今天官場特別風氣唔好，貪威識食。咁以前啲達官貴人以公款外遊，有冇特別尊貴招呼呢？一位在公營機構退休已久嘅長者級人物以前駐紮過外地，就知道非受薪高貴主席外巡，就有駐外人員提早巡視酒店套房，逐樣細微事物都檢查到，仲緊張過酒店經理，某次神推鬼擁，酒店與駐外人員檢查兩三次都走漏眼，等貴婦主席上到房，坐在豪華套房內化粧枱前，枱燈竟然壞咗唔着，於是大發嬌嗔，駐外人員當然受罪啦。
呢啲沒有外人知道的「美好生活」，今天恐怕沒有了，傳媒有料爆，講到尾要有人供料，邊啲人有料可以提供？當然係圍內人士啦，唔通係香港記者知道巴西里亞（巴西首都，究竟喺巴西邊一忽？）嘅秘聞乎？有咗呢啲事，就會授人把柄，用作民意調查之用，打擊當事人民望。高官與政治人物有「跣腳」四部曲：（一）自己缺乏政治觸覺，行事方法依舊；（二）有人因不同理由將當事人之行事爆料；（三）傳媒大肆報道、攻擊；（四）民意調查跟進，問題有傾向性。如此一來，當事人只能捱打，聽候發落。