股市老掉牙智慧，SellinMay（沽貨在5月），歐洲球季去到呢個月已屬荼靡，嫌部份球隊等收爐戰意難測；或者街坊都知要護級同爭霸嘅球隊賠率乏味，不妨考慮主攻今晚起開鑼嘅英冠升班附加賽。未來5場波全部直播兼形勢緊湊。個人認為伯明翰走勢最靚人腳平均，起碼殺入決賽，strongbuy（追入）。
季尾時份，近排喺唔同時段睇咗唔少非英國波，始終唔係小弟心目中杯茶，好似見A米上周主場鬥熱拿亞，贏咗一粒後尾段拉布後場傳足10分鐘，買咗[-1]嘅都幾激氣。啱啱禮拜二難得喺公司睇西甲早場降班膽桑坦德作客基達菲，兩軍好似未瞓醒未食早餐，得個躁字；成場波停多過踢，真係難為兩位不時無故大叫，製造緊張氣氛嘅評述員。（還好今屆附加賽應不設廣東話評述）
卡城最掹車邊
英冠唔同，硬橋硬馬，拳拳到肉，季尾聯賽已見精采；去到4隊爭1個升班位，幾億獎金當前，今勻冇得做假冇得拉布；今季參戰「4小強」其實相當正路，而且去到2、3月白禮頓同列斯聯冧檔後，形勢大定，列強穩紮穩打，大多賽事淪為排名戰。翻查呢4小強在對上一個月戰績幾近一樣，大約為3勝4和，嚴格嚟講，就只有3月底韋斯咸輸過畀最終冠軍雷丁，各路人馬戰績平穩，反映主理人對嚟緊部署已心中有數。
卡迪夫城喺4隊中最掹車邊，煞科戰反勝水晶宮以第6過終點，有驚無險；班波過去幾年多次埋門功虧一簣，家仲靠緊堅尼米拿同麥法尼呢類爭升老臣撐場，4小強中入波最少失波第2多，冇乜特別有利因素可以見到佢哋可以成功衝破阻力位。卡城尤其今晚要對嘅係非一般降班馬韋斯咸，對方今季作客波往往更能放開懷抱，展現強橫攻力；況且有賠率，捧韋斯咸，呢場可能係良機。
韋斯咸唔夠快
韋斯咸第3過終點，我唔同意領隊艾拿迪斯（大儍）所講，已經收貨；擁近全隊英超兵，季中再加碼簽入兩位英冠射手美爾納特同華斯迪，都失落直升，小弟認為佢哋中後場應付快速反擊較弱，打呢類隨時要加時或互射12碼嘅生死戰，真係交畀上天好了。本港韋斯咸頭號粉絲Keyman及本組編輯「視而不見」兄，就此謹祝你們好運。
黑池老菲臘斯唔fit
黑池乃小弟所愛，荷路威今屆續帶隊降落嚟，不脫主攻風格；但慨嘆係最強射手仲係今夏會度過39歲嘅菲臘斯同31歲嘅肥仔嘜泰萊費查，菲臘斯近月受傷患困擾，除非今屆打起嘅兩位土炮仔麥迪菲臘斯同湯馬士恩斯喺關鍵時刻突然神勇，否則我認為佢哋兩回合計，唔夠伯明翰打。
伯明翰走勢其實好靚，季初未調整降班心態，加上部份主力投英超隊套現維持營運，更要兼顧歐霸盃戰線，走勢反覆；但之後越打越好，歐霸出局但磨練到班波喺客場嘅經驗，之後足總盃作客殺低過狼隊同和車仔，唔怪得上月睇直播見佢哋單靠穩守突擊針針見血，僅被韋斯咸逼和3:3咁厲害。
伯明翰走勢靚
荷路威得兩個「菲臘斯」都係射手，但伯軍統領曉頓今屆喺本土市場買人有一手，最正唔使錢從卡城擸得基斯布基外，仲有老經驗入波最多嘅馬龍京治同長人中鋒施積；中場有後上殺手佐頓梅治及列特文，後防有入到波嘅居迪斯戴維斯同大衛梅菲，瓣數更多，決賽若遇韋斯咸，我想還是到時先轉軚定保留現時評價。
文：蘋果波神
