港鐵（066）噚日嘅股東大會變小股東申訴大會。港鐵上市以來不嬲股東會都冇嘢食得嘢飲，有位小股東一嚟就問管理層：「點解冇茶、咖啡同點心，等我同啲股東交流吓？」主席錢果豐官腔回應「可以考慮吓」。
呢位叔叔唔收貨，「西鐵咁大件事都解決到，點解呢啲嘢家畀唔到答覆？我要有點心！」錢主席冇符投降，「明年會有啲嘢係可以食嘅，明年會有點心供應。」
70幾歲嘅女士陳校長，攞住05年嘅剪報，話當時報道「地鐵股民收息新驚喜」，但到家都冇乜新驚喜，仲越嚟越孤寒，「PCCW（指香港電訊嘅股東會）都有50蚊美心券，但長者坐車，半價都16個幾。」轉頭又好感慨咁話：「聽講你好快退休，我好怕你退休，冇咗對手，你千祈唔好退，你將間公司run得咁好，如果你退休要話畀我聽呀。」唔知錢主席會唔會當堂冧番晒呢？