熱刺主帥哈利列納成日以為自己做硬英格蘭國家隊領隊，家陣突然俾鶴臣截劫，個心一定唔好受，所以佢日前亦酸溜溜咁話，有生之年都唔可能做到三獅兵團嘅揸弗人。所謂「塞翁失馬，焉知非福」，雖則佢教唔到英軍，不過家陣喺熱刺都撈得唔錯；前日熱刺憑艾迪巴約梅開兩度，莫迪歷同雲達華治各入一粒，作客贏保頓4:1，同作客贏車路士2:0嘅紐卡素，以36戰得65分，分別排第4同埋第5位，只係俾排第3嘅阿仙奴少1分，仲有機會爭入前3名而直入下屆歐聯分組賽。
話時話，因心臟病而暫時告別球場嘅保頓中場梅姆巴（上圖），亦有去銳步球場幫球隊打氣。保頓由李奧曲卡射入追成1:1嗰球仲鬼咁靚，可惜之後再輸3粒而負1:4完場；場波令梅姆巴一時興奮，一時失望，我求大俠幾驚佢個心臟頂唔住呀！