皇馬周三提早封王後，球會方面已籌備一連串慶祝活動，坐開篷雙層巴士喺馬德里巡遊就一定唔少得。講開勝利巡遊，舊年皇馬捧走西班牙盃後，沙治奧拉莫斯喺巴士上層太過忘形，一時跣手將獎盃跌落馬路，搞到皇馬非常尷尬。沙治奧拉莫斯今次就醒目喇，話一定會好小心，唔會再跌爛獎盃，再令球會出洋相。