自從小小超李澤楷做咗電盈（008）主席之後，公司每年股東會都好有睇頭，一眾小股東為咗電盈股價盡快返家鄉，可謂搞盡腦汁，又唱歌、又打鑼打鼓，更加有個叫電盈小股東大聯盟嘅組織成立咗。
大家或者記得，呢個大聯盟嘅代表「翔仔」陳仲翔，唔經唔覺翔仔已經大個仔，上個月仲升呢做老竇，噚日電盈股東會翔仔例必出席，更加獲得小小超點名做第一個提問嘅小股東，翔仔除咗同大家分享佢做老竇嘅喜悅，仲專程攞咗兩隻紅雞蛋送畀小小超歎吓，場面溫馨。
先禮後詐型
派完紅雞蛋，翔仔當然向小小超詐型，話自己全部投資都放喺電盈度，投訴電盈股價低迷，希望小小超諗計令電盈返家鄉。認真計數，電盈最高峯時期，股價應值140蚊樓上（計及合股因素），噚日3蚊都冇，返家鄉談何容易。於是翔仔向小小超獻計，建議搵股神畢菲特入股，仲話電盈切合股神嘅投資準則，就係行業龍頭、股價低殘，同埋收入與派息穩定，又話只要股神入股，唔介意大幅折讓㖭，講到真嘅一樣。
講開股東嘅鬼主意，電盈旗下香港電訊（6823）就有小股東建議，公司畀優惠價啲小股東用電訊服務。小小超就話，股票有買有賣，唔係咁容易，但都會「向高層反映意見」咁話，乜你唔係最高層咩？
李華華
mailto:[email protected]