後雷曼時代令到證監同金管局合作，要求銀行畀投資者「前2後5」嘅落單冷靜期，即係落單後兩日執行指示加埋售後五日嘅冷靜期。滙豐09年仲推出「創新」嘅30日冷靜期畀投資者，乘機搶客，為期半年。事隔兩年，滙豐翻推舊酒新瓶再搶客。
行政費都免埋
華華收到滙豐新聞稿，話即日起去到今年底，都可以享受到呢個「30天服務承諾」，即係買咗合資格嘅零售銀行及財富管理產品，30日內可以反口，到時滙豐退還收費。呢樣嘢熟口熟面，因為當年雷曼迷債出事後，證監諮詢過銀行界，話要推冷靜期，未正式公佈滙豐已經搶先推咗呢個「30天服務承諾」，今次比較新嘅，係畀65歲以上長者有較長冷靜期，足足有60日畀佢哋諗清楚。
滙豐呢招，其實仲有保障過金管局嘅「前2後5」，因為「前2後5」投資者反口要畀埋銀行行政費，滙豐今次呢個優惠就連行政費都唔使你畀，所以唔係保障咁簡單，直頭係想吸多啲客啦！