夫妻檔內房SOHO中國（410）兩位揸弗人不時都被傳鬧離婚，佢哋早排喺個blog度否認咗一次之後，就完全唔再理外界傳聞，近排仲趁住五一假期外遊一星期，但係就對今次外遊地點非常保密，連老友鬼鬼嘅華遠集團董事長任志強（人稱任大炮）都要估估吓。
任大炮：去天堂拜佛？
潘石屹伉儷上星期六（4月28日）出發，老潘喺微博度同網友道別：「將去一個沒有手機，沒有網路，沒有電話的地方去度五一節的假期。與微博上的朋友要分別一周左右，等回來我再與你們分享見聞。我會想念你們的。」就連佢老婆張欣都神神秘秘話：「尋找舊時的感覺，時光倒流。沒有手機、沒有餐廳、沒有電腦，看公園、看動物園、看紀念碑。」仲叫人估吓佢哋去邊度。
高調發展商忽然變神秘夫妻，就連任大炮都忍唔住問：「去天堂拜佛？小心迷路回不來了。」張欣就話返嚟先至向佢滙報，仲不忘寸佢一句：「這幾天你（任大炮）就寂寞啦！」
唔少網友都即刻估佢兩個去咗邊，其實呢個世界，即使唔係去外太空漫步，冇電話冇網絡嘅地方唔係多亦唔算少，都幾難估㗎，而老潘夫婦作為巴哈伊教徒，舊年底已經去咗聖地以色列嘅海法朝拜，所以唔少網友同華華都估，今次老潘夫婦應該去咗不丹。
正確答案係乜？唔好意思，佢兩公婆未番，問唔到回應噃！
李華華
mailto:[email protected]