今個龍年唔少人都爭住生BB，已經結婚嘅呂慧儀同黃文迪（Dickson）當然經常俾人追問造人大計，前晚佢哋喺圓方出席新戲《復仇者聯盟》（TheAvengers）嘅宣傳活動，再問到呂慧儀同老公究竟幾時生BB，呂慧儀都話：「我都唔知幾時，不過我就已經ready。」喺旁邊嘅Dickson都話恨做老竇，呂慧儀即刻搞笑向老公詐嬌話：「咁你遞紙申請先，之後再返屋企等消息。」Dickson笑笑口話知自己唔啱，會盡快向老婆交form申請。
秘方養身
呂慧儀話之前忙拍劇，家忙完一心準備同老公造人，點知又到Dickson唔得閒，不過呂慧儀已經問定啲護士朋友點樣養好身體，咁有冇用秘方調理一下先？佢話：「咁我家都仲係壯健嘅年紀，可以成功順理成章咁懷孕，唔使擔心。」不過佢都坦白講見身邊唔少朋友都生BB，自己都好想快啲生，Dickson識做即刻話：「咁努力啲喇！」
