陳豪和關禮傑在無綫新劇《金枝慾孽（貳）》中扮演崑劇老倌，為演得神似要跟老師上堂，每次都要上近七個鐘頭。前晚兩人跟老師練習，演花旦的關禮傑呻最初都覺得扮乸好奇怪；而陳豪則要快速瘦身狂減20磅，希望扮老倌時型神俱似。
無綫新劇《金枝慾孽（貳）》目前正拍攝中，陳豪和關禮傑在劇中扮演崑劇老倌和花旦，為了演出更為神似，無綫安排兩人跟老師上堂學造手等，前晚兩人到觀塘上課，更穿上練習的戲服，表現相當認真。
學速成崑劇
陳豪和關禮傑透露每次上堂皆要花約七個鐘，其中陳豪表示崑曲似上海話，單單發音便已花上不少時間，絕對不能求其，再加上要學身段造手，難度相當高，陳豪坦言：「平時學一個造手都要幾個月，但家為拍劇唯有學速成班。」
陳豪透露劇中演崑劇戲份即將拍攝，屆時會否現場錄音？關禮傑表示：「唔會喇，會預先錄，不過都唔係我哋自己唱晒，有人會代唱，但我哋都會唱少少。」是否需要減肥？陳豪直言：「都要㗎，我要減10幾20磅，老師見我咁辛苦，都有請我食雞髀。」
唔認玩斷背
關禮傑要演花旦，他表示同樣要瘦身，因太肥太大隻扮花旦會很肉酸礙眼，他坦言：「對男人嚟講，扮花旦真係有啲抗拒，好乸好怪，總係格格不入咁，不過跟老師學咗啲就好啲。」劇中是否玩斷背暗戀陳豪？關禮傑表示：「唔係，只係話我哋好夾啫。」
關禮傑又表示自己近日有時間便看電影學女仔的眼神，平時出街亦會留意女仔的表情，記者笑他奉旨女，關禮傑笑稱：「都係㗎，不過點都冇老師教得咁仔細。」
採訪：黃曉妍 攝影：陳順禎