【本港訊】6月加價5.4%的港鐵，車廂到處「甩甩漏漏」，包括窗框膠邊吊吊揈及車門防滑帶破損。專家警告，兒童若把膠邊套落頸把玩，隨時釀成悲劇；破損的防滑帶則是跣腳陷阱。
記者巡查港鐵將軍澳、觀塘、港島及東涌線列車，發現不少車廂有多處甩油及破損，包括窗框及座位膠邊鬆脫、車門防滑帶破損、車卡之間老化等。記者在油麻地站往調景嶺列車車尾，見到窗框約2.5呎的膠邊鬆脫，足夠讓小孩子頭部穿過。育有歲半兒子的港鐵乘客姚先生表示，曾目睹有兒童搣下甩脫的膠邊當糖吃，認為港鐵可改用金屬封住位置。
箍頸易受傷
理工大學機械工程學系工程師盧覺強看過本報提供的相片，指港鐵車廂膠邊老化，「窗框膠邊甩開，如果小朋友拎嚟笠住條頸，一旦急煞車，差唔多好似吊頸咁，一chok就傷到自己」。