由周大福（1929）董事兼太子爺鄭志剛（Adrian）揸旗策劃嘅超豪珠寶拍賣會，前晚順利喺灣仔君悅酒店舉行。周大福方面就同華華講，12件靚珠寶全部拍賣晒出去，一共賣咗2500萬元。咦？比起目標價3000萬縮咗水喎！
進賬2500萬
其實周大福舊年喺北京已經小試牛刀，搞過個小型拍賣會，當時19件貴價珠寶，拍出咗17件，做咗超過1000萬生意。如果咁樣比較，今年拍賣會貨品總算全部賣清，2500萬元嘅金額亦叫有進步！
周大福方面唔肯講，今次有冇邊位闊太名人投到心頭好，只肯話當晚招呼咗14枱內地VIP同8枱香港VIP，反應非常唔錯。華華希望今次Adrian考牌成功，日後可以為周大福搞多啲新意思，刺激吓股價都好吖！