薄熙來的故事愈來愈神奇。二月初，王立軍走入成都美國領事館，已經令人感到刺激，想唔到之後嘅故事發展，簡直不可思議，他日若搬上銀幕，由荷里活（不是香港或內地）拍成電影，搵JohnLone（中文叫做尊龍）飾演薄熙來，陳冲扮谷開來，至於那位海伍德，由LievSchreiber扮演，你認為是否適合？台灣明星潘偉柏做薄瓜瓜，夠似呢！
我地香港人冇資格研究薄熙來與中央鬥爭的故事，真相可能永遠不為人知，即使當年林彪坐飛機逃亡，在蒙古墜機死亡一事，依家我地又知得幾多吖，官方歷史版本最多係信五成嘅啫，其餘一味靠估，或正因如此，故事搬上銀幕就有大把想像空間，夠晒引人入勝。
呢日上到茶樓，外貿T竟然在座，左丁山第一個反應就係：「你唔係大連居民咩？」外貿T答：「家在大連啫，你都俾我返香港探訪朋友呀嗎！」當然得啦，香港人移居外地，幾時都可以返嚟行吓，不過佢既然來自大連，我地梗係講到前大連市委書記薄熙來啦，問外貿T有乜秘聞內幕，外貿T攤開雙手話：「其實你地仲知得多，好多新聞都係從外地聽番嚟嘅，好奇怪，英文傳媒不時有料爆，例如海伍德與谷開來之事，大連人聽到津津有味，議論紛紛。嗱，我冇嘢講俾你地聽呀，不如你地update吓我！」可能因為王立軍走咗入成都美國領事館逗留一夜，向美國人透露不少事情，故此美國傳媒特別多料，遠勝中文傳媒，以後可能陸續有來㖭。
外貿T話佢曾以外商身份，在大連見過薄熙來，佢話薄熙來好重視外商到大連投資，不時親自巡視外資工廠，問外商有乜要求佢幫忙，講得甚為客氣，而且佢一下令萬事暢通，極有威勢，故此佢萬萬料不到薄家竟有如此多秘密，幸好佢地與薄書記冇乜親密交往啫，在內地做生意不能不搞GuanXi，但關係去到太高層次，有時反成禍患之源，不可不謹慎言行。