豬肉股舊年開始神話破滅，雖然已經好平，但仍然無咩人夠膽玩，交投淡靜得出奇。海迪問證券界友人點睇，友人認為可以借鑑一下華寶（336）。豬肉股的確同華寶有唔少相同之處，1.大股東都係經常賣舊股；2.毛利率高同業一大截；3.兩間公司都好鍾意使錢，一間就不停收購，另一間就不停擴產。
曾經有人質疑豬肉股擴產，係為咗拎多啲政府補貼谷盈利，但tobefair，豬肉股即使扣咗政府補貼部份，過去幾年核心盈利都係升得好勁。
所以海迪覺得大家可以試下逆向思維，將個故仔掉番轉諗，可能會有啲啟示。
豬肉股舊年年底，原來曾經有一筆5億元的銀行貸款違咗約，喺公司公佈業績前一日攞到銀行wavier。海迪問唔到豬肉股違約嘅具體原因，據銀行界人士意見，通常俾得wavier，應該係仲還緊息，多數只係有啲財務比率突然惡化，先至觸發違約。曾經有券商提出過，豬肉股嘅利息收入和折舊攤銷數字有古怪。海迪等緊公司最新一次業績，希望可等到滿意嘅解答。
海迪