46歲的周海媚（海味）現時定居北京，久未露面的她前日現身銅鑼灣陪兩名女友人逛街濕平，曾被發現到平民雜貨舖買東西都要講價的她，繼續發揮慳妹本色，一小時逛10間店舖都能忍手齋睇不買，而備受紅斑狼瘡症困擾10年的她，早前病情復發，不過見她已回復皮光肉滑。
九十年代無綫一姐周海媚，早年轉移陣地到內地拍劇，並在北京定居，卻不幸患上紅斑狼瘡症，臉上長滿蝴蝶形紅瘡困擾足10年，雖然一度痊癒，但早前復發，被拍到她出入北京某醫院接受治療。
前日下午2時半，海味一身便服和素顏與兩名女性友人逛銅鑼灣駱克道，早前她因為病發臉上及身上長滿紅瘡，經過治療及休養，前日見她紅瘡已完全消失，且回復狀態皮膚又白又滑，但不知是否久未露面，還是打扮太過低調，當年的無綫一姐在行人川流不息的銅鑼灣鬧市逛足個幾鐘，竟然沒有一位途人認得她。
當街食豬肉乾
海味因患紅斑狼瘡，產量不多，但在內地拍劇叫價甚高，絕不愁生活，但她經常在平民區買平貨，曾被發現到平民雜貨舖買家庭用品都要講價，十分慳儉，前日她在駱克道逛了一粒鐘共10間舖，都能忍手齋睇不買。
海味與兩女友先逛了四間平民化時裝店，她不停睇手袋、銀包和衫裙，她的朋友掃了一大袋，她卻兩手空空。之後一行人轉戰電腦店睇電腦，她不停問店員資料，同樣齋問冇幫襯。路經街邊的飾物檔睇頭飾，她揀了一輪，最後只得她的朋友幫襯。兩手空空的她後來走到手機舖睇手機，左睇右睇考慮一輪，結果都沒買。之後三人再去逛兩間平價時裝店，友人試了一輪，三人均沒收穫。繼而再逛Sogo的名牌手袋店，海味試了幾個手袋，依然忍手冇買。
齋睇了一小時，海味終於發功，不過只是花了百多元買了一盒眼影和三杯乳酪消暑，她的朋友則買了一包豬肉乾，細心女友人怕她弄髒雙手，當街餵她食豬肉乾，見海味吃得津津有味，十分享受盛女生活。
採訪、攝影：梁繼光、黃曉程
