煲呔巴西之行入住貴價總統套房，被傳媒圍插，佢老哥玩盡海陸空，食遍省港澳，貪便宜形象深入民心，自然又惹非議。自金融海嘯後，全球民粹橫行，憎人富貴厭人貧，呢類行為實被人插，法國總統薩爾科齊已是人辦，他與夫人布魯妮的富貴生活，在大選中常被對家及傳媒抽秤。
要突破直轄市長形象
「總統套房」爭議背後，並不只是貪便宜咁簡單，還涉及外派、出訪及國際化問題。英治時代將政務官捧成精英，其中一個舞台是外派，跟住鬼佬做駐外經貿辦。以前政務官政治訓練中有兩大系統，一是派到地區做政務專員，掌握本土政治，同街佬打交道。另一途徑是外派，煲呔年輕時也曾派往馬尼拉亞洲發展銀行，80年代後派往駐外經貿辦，都係當紮政務官，尤其係歐洲日內瓦、美國華盛頓等，當年黃灝玄、邱騰華等政務官都曾駐兩地。
香港是國際有名的經貿中心，早年已參與關貿總協定GATT工作，所以在WTO及APEC有獨立身份，連帶駐外官員也有一定地位。回歸前香港總督外訪，也一樣有特殊地位，彭定康出訪也可會見總統、首相或總理。回歸之後在一國兩制下，香港仍有獨特的地位參與國際組織，簽訂自由貿易協議。從香港利益而言，要凸顯一國兩制優勢，保持國際金融中心地位，應與內地城巿有所區別，所以特首及司局長應更多出訪，不能定位為一個內地直轄巿長。香港一定要爭取更多國際曝光，好似煲呔同世銀行長拉加德一齊出席世界經濟論壇做嘉賓，呢類機會必須把握。
成功靠死充 多打交道
香港人討厭權貴大花筒，大可批評，五萬幾蚊一晚住總統套房係有問題，但要分清香港特首不是內地巿長，不能因不滿花費而自我矮化，誤認為日後特首高官扮鵪鶉，做好巿長對內角色便足夠。
香港過去成功，係因為「死充」，係唔係都逼入去國際舞台，滿口英文，識同國際傳媒及機構官僚打交道，過去幾十年抆住英國佬衫尾，借英聯邦關係，在國際經貿層面種下不少關係，呢啲先至係香港本錢。
香港要一國兩制，就係要有國際關係，而對中國而言，要發揮獨特角色，香港國際化好緊要，唔應該變成深圳、廣州。
添馬男