與朋友傾開電視遊戲經，他跟我說其曼聯一季入逾百球，其中單是C朗一人就入了50球。估不到，電視遊戲的情景竟會在現實世界出現。
西甲在歐洲5大聯賽之中，被認為是水準最高的，可是高水準只是源於有巴塞及皇馬。巴塞本身隊波勁，皇馬則因為球星多而厲害，故看他們比賽的確賞心悅目。巴塞及皇馬每次打聯賽，球迷總會談論，究竟他們兩隊會入對手多少球；而站在球迷立場，梗係希望入球越多越好。但問題是，當見到巴塞及皇馬場場大炒對手，久而久之便會覺得有無癮，因為太過強弱懸殊，根本冇睇頭可言。
好睇唔一定要多入波多，猶記得86年世盃8強，法國及巴西在120分鐘只炮製了兩個入球，不過兩軍的精湛球技，至今仍令人津津樂道。五五波一定好睇過九一波。
數年前，西甲還有拉科、華倫及維拉利爾等與巴塞及皇馬抗衡，不像現在一樣由巴塞與皇馬瓜分，故那些年的西甲，競爭亦較激烈及好睇得多。一個聯賽有20隊，當然是有些強，有些弱，但巴塞及皇馬卻獨大，其餘18隊都是陪跑，情況就好似蘇超，整個聯賽由些路迪及格流來主宰。唯一分別，是西甲的水準的確比蘇超高，惟本質卻是一樣。一句講晒，西甲好蘇超囉！
青蛙仔
周一．青蛙仔
周二．仙道彬
周三．吾中
周四．牽牛
周五．丘建威