每逢世盃，最吸引女士眼球的新聞，是如何適應「足球寡婦」的日子。這刻薄名詞肯定比剩女/盛女更早誕生，原意是指一到世盃，男人都只懂埋頭足球，每天除了睇波就是睇波，嬌妻被拋諸腦後自然變「寡婦」。記得南非世盃有旅行社搞旅行團，讓一班太太乘機出外散心免眼寃，今年是歐國盃大日子，不知會否再來一次。
要找個能齊齊睇波，甚至捧埋同一隊的女友/太太，尤其是你捧的不是曼聯，或英格蘭，機會率只會比車路士贏巴塞隆拿更難。而且對男人來說，沒甚麼比一大班麻甩佬齊齊睇波更過癮，贏波擊掌（買中了更甚），輸波齊哭波喪，伴以啤酒、薯片、粗口，就算妻子多賢淑，此時此刻也比不上一班損友。
女士對男人睇波、打波等活動大多興趣闕如，譬如我們多相約在周日打波，已婚有小朋友的，通常要湊埋小朋友出來，才得「批准」打波；未有小朋友的，則肯定要飲完茶安撫好太太，才能出來開波。上周日有一出名怕老婆的朋友竟主動約我們打波，一出來就問他何以振夫綱，原來他早早下載了兩套戲讓老婆慢慢看，才能趁幾小時空檔，「無人看管」出來打波。
為季後賽廢寢忘餐
愛NBA的男人更痛苦。事關世盃四年一度，季後賽卻年年有，每到4月尾至6月中，16支球隊為總冠軍打生打死，幾多NBA迷廢寢忘餐。可是開波時間大多在早上，上班一族怎辦？
在公司「冒死」開gamecast或scoreboard小事，有些更豪到即買現在減到428港元的NBALeaguePass，在電腦、手機或iPad偷看，更要慎防老細突然出現在背後，其辛苦不足為外人道。
世事無絕對，兩人相處之道貴乎遷就，若你的另一半肯在「緊要關頭」暫時屈身在籃球/足球之後，感恩吧！
仙道彬
周一．列紅塵
周二．仙道彬
周三．守丹
周四．視而不見
周五．丘建威