講開周大福（1929），前年初佢哋以2.75億元天價買入507卡南非鑽胚，聽到大家哇哇聲，事隔兩年幾，粒大鑽石仲喺非洲，但聽聞已經完成切割打磨，家辦緊「出境」手續，預計今年下半年運番嚟香港。
身價起碼十億
呢個鑽胚切割後，最大一粒名為CullinanHeritageI，超過100卡，真係稱得上價值連城，聽講周大福未必會賣，可能當成收藏品，班高層家諗緊下半年運嚟香港後，好唔好搞個展覽會畀大家欣賞吓。
聽行內人士講，粒石嘅鑽胚都要近3億元，拎出來賣肯定要一個宇宙價啦，10億、8億實走唔甩。華華心諗，早年有人用幾億天價買樓都畀傳媒查家宅，用宇宙價買呢粒咁出名嘅鑽石，買家主動公開身份最好，唔公開都肯定畀所有傳媒追到瘦。如果買家本身係大有錢佬就無所謂，如果係隱形富豪，實被人翻箱倒篋咁搵佢資金來源同發達之途，都咪話唔煩，除非呢位人兄或人姐好想出風頭啦。