從鬼門關逃出生天、61歲的蘇杏璇，在過去十年飽受糖尿病煎熬，體重由一百五十多磅跌至現在不足一百磅，因為擔心雙腳被鋸斷而諱疾忌醫，直至今年農曆年間，因為爛肉發黑及發冷，病情嚴重需緊急入院動手術，一雙腳成功保住，但其中一隻腳趾就保不了，因枯萎被鋸走。
在醫院住了兩個月，動了四次切爛肉手術的蘇杏璇，日前已出院回家休息，她坐輪椅接受車淑梅的港台節目錄音訪問昨日播出，雖然她瘦骨嶙峋只得九十多磅，但精神不錯，中氣十足。
皮膚變黑頻發冷
蘇杏璇表示入院前一個月因為腳腫，不停看中醫和針炙都無效，直到今年年初三，腳上發炎爆拆的皮膚突變黑色，她穿上羽絨、甚至棉胎披全身仍不停發冷，朋友馬上介紹她轉睇糖尿專科，璇姐說：「醫生要我即刻入公立醫院，醫院即晚幫我做手術切爛肉，做完手術第二日洗傷口，睇到傷口好深，第四隻腳趾冇咗，因為枯咗，腳底又割咗一大嚿肉，成隻腳變成唔係人嘅腳，心情好沮喪，唔開心。」
因為兩隻腳生滿爛肉，每隔兩天就要動一次手術，住院期間總共做了四次手術，信佛的她不停唸經求保佑，她哽咽說：「未入院前，寧波車去屋企探我，幫我加持，有三位師傅見到我，叫我一定要去睇醫生，話我一定會好，今次唔使鋸腳好奇迹，係佛菩薩加持。」
蘇杏璇謂腳上被切走的爛肉，不少凹位已長了肉，開始回復平滑，現在只欠被鋸斷的第四隻腳趾傷口仍未平滑，她開心說：「好快唔使坐輪椅。」她呼籲大家不要諱疾忌醫。
經歷大病想出家
璇姐回憶與佛結緣是在23歲那年，她突然抬頭望向天空，見到一幅畫，天空是墨綠色，中間有個好大的頭，嘴角微笑，之後聽到法師跟她說：「演藝界要出一位法師。」她表示在媽咪病重時，一度想出家，不婚去修行，而經過這場大病，她再萌出家念頭，她忍淚說：「屋企人知我呢個心願，只係家未係時候。」
對於憑《奪命金》奪金像獎最佳女配角，她謙稱：「做唔番以前水準，今次演出令杜琪峯好失望，佢覺得我冇以前咁話頭醒尾，但佢係好導演，寧願嘥多啲菲林，我好內疚，我呢個獎其實應該頒畀杜琪峯。」
璇姐16歲時加入麗的呼聲，17歲已開始演媽媽角色，在無綫劇《新紮師兄》中飾演梁朝偉媽咪，她說：「家仲當偉仔係自己個仔，我都希望可以同偉仔喺銀幕續母子情，但我諗好難，我諗我同偉仔嘅緣喺嗰時已斷咗，但諗番起開心就夠。」
採訪：葉雪