蘇亞雷斯真係似碧咸！吓！哨牙蘇又點可以同萬人迷比呀？稍安勿躁，我求大俠講嘅係蘇亞雷斯喺上周六對諾域治嘅半場入波，同碧咸初出道時笠入溫布頓嘅金球好相似；而阿蘇就憑呢一球，攞到佢加盟利物浦以嚟嘅首個帽子戲法，仲因為咁連紅軍隊長謝拉特本來想罵佢罵到口唇邊嘅說話，都嗗聲吞咗去。
媲美萬人迷金球
蘇亞雷斯自從去年1月以2千多萬鎊由阿積士轉會利物浦後，好波就係好波，仲不時入啲高難度入球；不過由於佢踢法蠱蠱惑惑，好難捉摸，所以一直同紅軍前線球員夾唔到。佢早前仲因為種族歧視曼聯嘅黑人後衞艾拉罪成，搞到被罰停賽8場；又因為呢件事搞到撐佢嘅紅軍領隊杜格利殊都幾乎一身蟻，令紅軍躉對佢又愛又恨。好彩，佢喺上周六作客諾域治嘅英超夜場，就終於證明自己係世界級球員。
烏拉圭國腳蘇亞雷斯喺對諾域治時，喺24及28分鐘連環入球，早早協助球隊領先2:0，不過之後佢就開始想騷哥利，不時喺門前玩嘢，搞到一直無法再拉開紀錄；而當佢喺82分鐘時帶帶吓個波，見諾域治門將魯迪企出咗啲，就毫不猶疑喺過咗半場白界線少少就起腳，而最後皮球更應聲入網，3:0。阿蘇呢一球，真係媲美碧咸初出道時對溫布頓嘅半場入球，基本上可以列為英超歷來金球之一（見附表），而令佢更高興嘅係今次仲係佢加盟紅軍以嚟嘅首個帽子戲法㖭。
杜帥話係團隊嘅努力
賽後利物浦隊長謝拉特都話阿蘇呢腳世界波，令佢唔駛俾自己鬧：「我基本上已鬧到出口㗎嘞，點知佢就射入咗球咁神奇嘅世界波喎！蘇亞雷斯真係好特別嘅球員，當佢着晒火時，絕對係世界一流球員。」
至於杜格利殊亦話：「今役勝出係團隊嘅努力，不過蘇亞雷斯所入嘅幾球的確好靚，相信佢一定會成為明日報章嘅頭條人物。」阿蘇咁弗，睇嚟當紅軍喺星期六嘅足總盃決賽鬥車路士時，車仔一定會派專人「招呼」佢嘞。
