早前收到朋友傳來一則招聘家庭教師的文案，據稱真有其事，然條件苛刻，工務繁重，至於待遇方面，若然相比體力勞動工作，還算可以。其時想法當以為只是憑空杜撰，玩笑性質，所以看過就算。沒想到，這兩天在網上又看到同一廣告，而且是上載了剪報影印本，像真度超高，起碼這次我就信了。當然最終都有機會係惡搞版本，二次創作，不過在網絡廿三條（即最新的版權修訂條例）通過前能夠公開娛眾，何樂不為？
做家教難過做特首
講番嗰則招聘家教嘅廣告，工作範圍如下（原文照錄，免得掛一漏萬）：由起床至送上學一切生活細節、教育及照顧（呢啲咪係應該姐姐做嘅咩？），密集式上數學、英文、普通話及練琴（另備注需自行準備教材及課程計劃！家陣請補習天王呀？不過啲天王都係專攻一瓣，未必能有兼教嘅能耐）；目的在提高自理能力、禮貌、服從性及改善紀律（最基本的品格培育工作，父母竟能外判？）；及需管理傭人工作進度（吓，唔係太太或家中長輩包辦，難道一般家庭仲會有管家？），需即時工作（所以我有合理懷疑非但姐姐要回鄉，好大機會仲要係個太太都出走，身兼母姐兩職，予人同情）。
若然有人真的基於此家孩子孤苦伶仃，沒人照顧而動了惻隱之心挺身求職，還得符合以下「簡單」條件，方有機會獲得聘用，其中包括：需要三年或以上幼稚園教師經驗、八級鋼琴、修讀兒童心理學，認真嚴格，有老師威嚴！！！綜合而言，我認為有一定鋼琴造詣的幼稚園校長應可勉力而為。不過更有價值的是，這樣的篩選思路，相當值得作為制訂2017特首選舉門檻的參考，正是「高到無朋友」。
一腳踢 時薪96元？
當然無論要求或條件有多苛索，只要出手夠照一樣可以聘材。而薪酬方面是：7K-12K，至於工作時間由星期一至六，上午8時直到下午1時，每月合計約125工時。以最高薪付計算，時薪折合96大元！足足係最低工資嘅三倍幾呀！不過家陣一個八級琴師齋坐，然後叫條靚仔自己彈嗰幾粒音，一個鐘都要收兩舊，而我廿幾年前淨做家教，嗰陣都收人60蚊一個鐘！所以今日讀此廣告，心諗若真的有人咁抵得諗，竟願以此「薦」價擔起這幾近「代理老母」的工作，請容我代以上家長一拜。至於不食煙火、位居神級的家長，更要一拜再拜。
盧先亞