上市無耐嘅周大福（1929），四個幾月嚟股價都無點浮過上水面，睇嚟管理層都要加多兩錢肉緊，衝吓業績喇！最多諗頭嘅周大福董事兼太子爺鄭志剛（Adrian、A仔），呢期就集中火力推貴價珠寶銷售，由佢全權策劃嘅周大福私人珠寶拍賣會，今晚就會喺灣仔君悅酒店舉行，聽講會拍賣12套獨一無二嘅超豪珠寶，每件平均價值70至800萬元不等，公司目標係整晚可以做到3000萬元生意，順便打響招牌，以後每年都搞一次拍賣會咁話。
邀請近五百VIP豪客
華華聽講，今次拍賣會總共邀請咗480位VIP、合作夥伴、同有份搞上市嘅Banker出席，彤叔嘅富豪朋友亦會參加競投，不過只會用電話出價，唔會高調現身喎。
其實周大福不嬲都有銷售超豪珠寶，喺香港呢啲靚嘢多數係privatesale多，貴客會自己打電話order款式，公司親自拎幾件上去畀佢揀，落舖都搵唔到。喺內地，周大福就喺全國開咗30家貴價珠寶專賣店，招待富豪，聽講貴價珠寶佔周大福整體銷售都有成20%至30%㗎。
周大福今次拍賣會，特別邀請咗內地130位超豪客，佢哋過去一年喺周大福平均消費100萬元，周大福會全程招待佢哋三日兩夜遊香港，又試酒又食好嘢，聽講仲會「一條龍」參觀埋新世界（017）嘅豪宅「名鑄」同K11㖭！呢啲咪叫交叉銷售囉！
鄭志剛設計系列登場
聽講今次A仔好落力，充滿藝術細胞嘅佢，自己有份設計咗一套叫「芭蕾舞者」嘅首飾系列（A仔係ArtDirector），今次都有幾件拎出嚟拍賣。咁多才多藝，會唔會快啲有得接班呢可？
李華華
mailto:[email protected]