中國神華（1088）兩名前非執行董事劉本仁同謝松仁上個禮拜五以年齡原因請辭，公司冇幾耐就宣佈搵咗兩個猛人接手，特別之處係佢哋都係運輸界，分別喺航天同航海方面有相當豐富經驗嘅孔棟同陳洪生，唔通因為首季業績唔多靚，搞到神華要上「天」下「海」搜括人才？
孔棟同陳洪生都係今年2月先被神華阿媽神華集團委任做外部董事，擺明係為加入上市嘅神華鋪路。睇番兩人嘅履歷，孔棟曾經出任中國國航（753）董事長、國泰（293）非常務董事及董事局副主席等，熟悉航空管治，可謂天空任我行。
陳洪生嘅背景同孔棟啱啱相反，佢就係海上霸王，曾擔任中遠洋運輸集團總公司副總裁、中遠航運董事長、中遠控股（1919）執行董事兼總經理、中遠太平洋（1199）執行董事、董事會主席兼非執行董事等，對於神華海上運煤應該幫到手噃。