過去一個月，投資者都在疑惑中央是否放水、美國會唔會有QE3、歐債問題復發與否等問題，令港股只在1000點之間上落，加上早前民企風暴打擊了投資情緒，可謂令市況悶上加悶。當然，唔可以將所有事歸咎於民企身上，因為不少國企最近都派了張令人失望的首季成績表，甚至發盈警，如果唔係內地經濟增速放緩比預期多，使投資者對企業經營環境仍然欠佳的情況早有預備，相信市況會比現時更為淡靜。
其實觀乎內地的新聞，中央正逐步微調政策，希望可改善經營環境，但要扭轉整個形勢非一朝一夕可以，要見到中資股業績明顯轉好可能要等多一段時間，在此背景下，相信強者越強的現象還會持續多一陣，除非業績有明顯好轉迹象，否則實無謂貪平嘗試去撈弱勢股。
大市依然一片死寂，等待突破，如果無特別睇法，這段時間應繼續將焦點放在個股上，其中小型風電股中國瑞風（527）可以望多兩眼。瑞風上周五復牌，宣佈發行可換股債券以及認股權證，擬用作完成河北紅松風電收購事項。
瑞風是最近少有出好消息仍可維持上升收市的股票，又捱過了民企風暴，同時收購風電這類常令人輸錢的項目市場都無負面反應，算係受得到考驗。組合今天亦會以不高於2元買入10萬股，小注博一博。
張士佳
寶來證券（香港）資產管理部董事
本欄逢周一、三、五刊出