組合「閃爆」出道初時都算幾紅，但玩咗幾年之後成員「阿們」越嚟越懶散，搞到「顏色」都冇心機玩，之後佢哋當然俾樂壇淘汰出局，而顏色仲要幫屋企還債，所以就去咗拍戲搵銀，終於好艱難咁至還清債項。唔知係咪慳慣咗，顏色成日食嘢一味靠黐唔畀錢，有老細照嘅飯局就玩天光，要夾錢嘅飯局佢就會喺差唔多埋單時借尿遁，次次都叫朋友幫佢畀住先，之後就梗係冇得還啦。如果顏色只約一個人食飯，佢一定揀茶餐廳，因為萬一唔可以借尿遁，即使要埋單都貴極有限嘛，但聽聞最近佢面皮厚咗好多，同朋友去食嘢，一坐低就叫人請佢食公仔麪，埋單時仲光明正大咁走人就算。
撰文：關仁