天真許打電話嚟恭喜：「你中晒，好嘢！」中乜呀，中三T就話啫，原來佢係指左丁山估中車路士擊退巴塞隆拿，昂然進入歐聯決賽，對拜仁慕尼黑爭冠軍，在拜仁慕尼黑主場舉行，認真係一場打甩髀大戰。
巴塞擁躉一定好唔高興，好不服氣，主客兩場完全㩒住車仔嚟攻，但硬係冇法子贏波，美斯連射十二碼都中楣，莫非係天意？可能有一位足球上帝覺得09年車路士對巴塞，俾偏心球證吹死咗，故此呢場將啲運氣送晒俾車路士！乜唔係呀，開波唔夠十分鐘，車仔主力中堅卡希爾拉親條筋傷出，然後隊長泰利犯規，紅牌出場，十人打十一人，仲要冇咗兩個中堅，落後零比二，仲唔輸梗？買咗巴塞贏波嘅球迷，收少一個仙都唔肯啦，點會諗到完場時嘅紀錄係二比二噃！
人生如足球，處下風者未必輸硬，總要保持昂揚鬥志，力拼到底，堅持到最後一秒鐘。英國寄宿學校以打欖球為學生精神訓練，落場打過波，有鬥志、有團隊精神嘅學童，他日在社會上之表現，不論行業，總會好一啲。香港教育一個不足之處，就係大部份學校不注重體育與團隊球類運動（足籃排），好少學生參與過學校聯賽，決賽，於是學唔到體育精神與拼搏精神。
車仔隊長泰利係老波骨，竟一時發癲，用膝頭撞山齊士屁股，山齊士立即詐諦倒地，令球證趕泰利出場，泰利何其蠢笨也，點對得住班兄弟？巴塞在上半場完場之際，慘失一個長傳突擊入球，下半場唯有拼命進攻，希望贏三比一出線。但車路士用費蘭度托列斯賽前所講一套：追逐巴塞球員，一定累死自己，我地要與巴塞爭空位空檔，不爭皮球。果然，車仔九位球員在十八碼禁區前企好位置，唔四圍撲，令美斯等人無法製造空位入揳射門，卒之俾車仔悶死，至於臨完場前費托突襲入球，只係意外啫，即使冇呢個入球，車仔都以作客入球取得出線權嘅啦，不過咁，車仔以弱勝強，打到有內傷，決賽有泰利、伊雲奴域、米基爾、拉美利斯、米亞尼斯五位主將不能出場，想攞冠軍，真係要足球上帝再度發功？
另一場準決賽，皇馬重蹈巴賽覆轍，領先二比○之後俾拜仁取得一個作客入球贏二比一，兩場合計賽和要加時，睇住皇馬啲球員在下半場逐漸發軟蹄，真係多得嗰場西班牙國家打吡唔少！射十二碼定勝負，德國人差唔多贏梗，有歷史數據可尋嘅！至於車仔可否在拜仁主場贏波奪盃，下次再講！