陳奕迅老婆徐濠縈除咗熱愛時裝之外，近年亦愛上跑步，噚日阿徐就同志同道合嘅好友連詩雅、盧凱彤（Ellen），喺台灣參加Nike主辦嘅台北女子10公里賽跑。除咗幾位香港藝人代表，台灣組合S.H.E嘅待嫁新娘陳嘉樺（Ella）亦有落場，相信佢係想操弗自己，希望以最佳狀態出席婚禮。
堅持完成比賽
起步前阿徐、Ellen同連詩雅都有同Ella合照留念，不過連詩雅就唔係咁好彩，佢跑咗一公里時唔小心仆倒受傷，左膝同手都擦損流血，工作人員即刻帶連詩雅去救護站治理，佢仲忍唔住當場落淚。幸好連詩雅傷勢唔算嚴重，包紮好傷口後佢仲堅持繼續比賽，結果佢只係比平時嘅成績慢咗兩分鐘。
連詩雅啲朋友知道佢咁叻，都喺微博留言讚佢，連詩雅亦留言話：「第一次在大家面前大哭大叫，好尷尬……雖然真的有點痛但我好開心最後完成賽事，真的要謝謝你們一路陪着我和等我。」睇唔出連詩雅外表嬌滴滴，原來耐力絕對唔比男仔差，的確值得讚賞。