最近好鍾意睇有線李香琴朱古力廣告，身穿舊版精工球衣光頭鬍鬚佬一面不滿，埋怨隊友踢波冇體力：「搞乜嘢呀，你李香琴上身呀！」李香琴飾演的隊友化身，有神冇氣反駁：「我搏晒老命㗎，大佬呀！」光頭佬再寸佢：「你冇食飯咩？」李香琴發爛渣：「咁叻，你踢埋佢囉！」每次睇都諗起新舊政府交接問題。
無縫交接 變新舊對罵
外國政府新舊交接，閒閒哋半年至一年，當年奧巴馬入主白宮，成年都未搵齊政治任命官員。從來冇乜所謂「無縫交接」，加上民主國家實行政黨輪替執政，反對黨有影子內閣成員，一旦大選勝出，影子內閣立即可以接手。香港奉行行政主導，特首乃孤家寡人，所謂內閣乃湊合而成的雜牌軍，並無一致的核心執政理念。在四不像體制下，要無縫交接，定會變成了新舊班子互相埋怨、指摘的局面。一如光頭佬與李香琴。
要兩個月內完成架構重組，本身不切實際。因為在概念設計之外，有大量行政工作需要商討，加上立法會程序，如此重大改組，即使建制派瞓身支持，也冇道理反對內會成立法案委員會討論。所以單單應付法定程序已未必趕及6月30日前完成。更大障礙是未開工，梁營人馬已半明半暗指摘現屆政府，未做已將失敗責任推予對方。你話要落手落腳做的政務官，對這些充滿酸味、怨氣不絕的梁營人馬言論，會無動於衷嗎？一邊趕工做，一邊仲要畀人唱，做出來功課有冇甩漏，好難保證。本來重組架構有一定合理性，振英並非亂搞一通，為免好事變壞事，向公眾、政黨及議會政治說服過程更加重要，一味催促埋怨，只會壞事。
掌權者要大方有氣度
掌權者要表現大方有氣度，是從政基本要求。振英本人還好，一去到其他人就變味，始終甩唔到那股怨氣，而呢類言論最終是算到振英頭上，新政府新作風，除人事任命、架構重組外，也講求施政作風。當選至今仍甩唔到陣怨氣，巿民也會諗：「你班人，搞乜嘢呀？」
添馬男