中軟國際（354）橫行大半年，無郁過，有得諗。中軟喺祖國領導性IT企業，2011年度（12月底止）表面賺1.1億銀人仔，但若果唔計股權、呆賬撥備等等非現金性因素，中軟2010、2011年兩個年度嘅業務貢獻利潤，實際上達到2.3億銀及3.2億銀人仔，增長近四成，好靚仔。要咁睇，中軟有祖國大機構及政府相關部門大客仔，加埋祖國軟件產業，喺阿爺及經濟增長支持下，好環境，而單係今年頭兩個月，總體實現收入近2900億銀人仔，增幅達到25%，唔講中軟本身優勢，就咁食住條水行，都繼續肥仔。唔好計多，中軟本年度業務貢獻利潤增長25%，都到4億銀。以呢個數做基準，PE得7倍，又以10倍做目標，中軟要見3蚊，潛在升幅41%。
五礦建設可短打
五礦建設（230）終極控股係五礦集團，講實力，夠晒。又集團最新NAV折讓近50%，上年底嘅淨借貸比率34%，講折讓及財政質素，都全部過關，理應可以擺喺上邊寫多啲。可惜，市場對內房股信心無乜，唔長揸，改變策略，睇位短打。呢轉喺0.89元至1.14元長方形區炒波幅，潛在回報率28%，都有魚有肉。
錢雋