出外靠朋友是老生常談，大家聽完也覺是廢話，但這句話卻是now電視《一個地球》節目主持人洪永成Tony的成功座右銘，實踐後成為他的旅遊必殺技，不但助他交來各方好友，更令他發掘獨特的節目新題材，人生事業均更進一步。
記者：姜穎妍（相片由被訪者提供）
由當地人介紹更深入
Tony主持多個旅遊節目，包括《一個地球》、《活得很滋味》等，題材新口碑好，很受觀眾歡迎，部份節目甚至已開拍第三輯。大家愛旅遊，多渴望體驗當地生活，了解不一樣的人，可惜就是因為不熟悉，往往很難發掘特色題材。為向Tony取經，甫見面坐下，我馬上直接請教Tony如何尋找到新奇的題目，誰知Tony拋下簡單一句：「出外靠朋友！旅遊節目介紹的全部是自己不熟悉的國家，要做得好睇，最好搵當地人介紹。」
深入火節學整公仔
原來Tony製作題目前，均會於一個月前搵人幫忙，「我試過想去西班牙華倫西亞睇火節，於是開始周圍物色睇睇有無人識當地人，咁啱有個朋友學緊西班牙文，佢老師好好人肯幫手。」火節是西班牙重要節日，居民為了籌備，出錢出力之餘，更足足準備一年時間，節日高潮是焚燒紙公仔，「公仔由藝術家做成，諷刺時弊正經搞笑等題材都有，公仔有三至六層樓高，亦有六十多個，燒起來非常壯觀。」節日本來已很精采，但Tony就找到特別題材，「靠人介紹認識一位西班牙主婦Vicky，估唔到佢帶我哋去睇摔跤比賽及街頭塗鴉，仲介紹我認識籌備火節的總監，結果我可以拍攝紙公仔製作過程，算是開創媒體界深入火節的先河！」
食早餐伴歌聲
Tony曾去尼泊爾做義工，住宿當地人屋企，主人Nimesh好Nice，一朝早準備好早餐，喺天台擺好枱後叫Tony上去食，食早餐時更邊彈結他邊唱歌。
墨西哥Club 分層較舞技
在墨西哥，Tony又靠朋友建奇功，「拍攝中途發現唔夠內容，即時拜託導遊幫忙，導遊話地膽Jordan可以幫到我。」原來Jordan是當地的士司機，懂得很多有趣門路，「佢帶咗我去SalsaClub，嗰度好得意，分為三層，三層唔係以價錢劃分，而係以舞技，有初級、中級及高級之分，畀唔同Level的人參與。」
話明是奇功，又怎會只限於一間有趣的Club，「Jordan仲帶我哋去咗個有兩至三個籃球場般大嘅音樂廣場，我會稱之為臨記場所，廣場入面嘅人都識玩不同樂器，當地人會在這裏點將，好似睇戲咁喺碼頭即場搵苦力搬貨咁，例如我想搵隊Band哄女朋友開心，就喺度搵鼓手、結他手及主音，之後佢哋會幫我表演，我再畀錢佢哋。」
沙灘寫字 溫馨體驗
Tony曾遇到最深刻的溫馨體驗，「去新西蘭時由贏得絕世筍工嘅Ben招待我哋，佢喺沙灘寫字歡迎我及莫文蔚，那時我很感動！我之後遊澳洲昆士蘭時，也有探望Ben呢！」
日本妹認定 上海盛男
當地人懂得門路，固然令人方便，但原來半地膽也會帶來另類衝擊，「有次搵咗多年前嘅大學同學，她是日本女仔Chiaki，帶我遊上海，仲招呼我住喺佢屋企，佢話我知佢嘅日本朋友好羨慕佢去上海，因為佢哋覺得上海男人好好，會做家務。我聽完呆了，估唔到上海男仔原來咁有Market！」
失敗之邀 毋須介懷
邀約看來不似太難，但原來Tony也有多次失敗經驗，「當然成日失敗，有好多人唔覆，或朋友介紹完唔願意幫忙，但其實唔需要介意，問一句或Send一段文字無乜大不了。」
Tony說有兩次較奇特的經歷，「有次搵個女仔帶路，點知佢剛同男友分手，捉住我哭訴佢同男朋友嘅事，傾咗成晚。另外自細讀書識嘅澳門朋友Semen，有次我去澳門，她幫我搵酒店，竟然搵到三百幾蚊一晚，見到咁平我都好驚訝，後來上網Check先知原來酒店前身是發生過哄動一時的八仙飯店兇案！」
靠朋友不代表抽水，很多朋友日後也會回訪，Tony也很樂意陪伴他們，「再次見朋友，帶他們出去玩，真的好開心，好高興能帶他們認識香港。」
即場示範識朋友
自問溝通技巧差勁，在訪問期間我請Tony即場示範應怎樣與人打開話題，他毫不猶疑即說：「你好！我是香港旅遊節目主持，想找些能代表某某地方的題材，製成節目。我找到這間咖啡店，請問這間店好不好？有時間的話是否方便回覆？一起去喝杯咖啡？謝謝！」成功率有多高？Tony說好多人好友善，他在Forum或facebook一次過發出十個邀請，總有一兩個人回應的。笑問Tony有沒有因這邀請而帶來艷遇，他就叫我自己想像……
識當地朋友四法
1.詢問身邊朋友
看有沒有當地朋友介紹。
2. 參加義工團
因聚集了世界各地的人，一齊玩一齊住，感情會好好。放假過得有意義，幫到人又增廣見聞。
3. 善用交友網站
可上網如couchsurfing，找尋願意帶路的當地人，或加入論壇如背包客棧，請教網友當地資訊，之後詢問回應得最多的網友，有時他們也會願意現身見面帶路。
4. 住宿Hostel
會遇到很多來自不同國家的人，可結交不同國籍的朋友。
Couchsurfing網址： http://www.couchsurfing.org/
背包客棧網址： http://www.bbkz.com