學人懷舊，不如讀吓前人所寫之掌故、野史、生活筆記。前輩高伯雨之「聽雨樓隨筆」在信報刊登咗好多年，係左丁山長期追捧之專欄。高先生（1906-1992）係南北行老店家族後人，自小不愁衣食，有錢有時間跟名家學習書畫，到英國遊學，故此見識零舍唔同，亦與一般酸秀才、窮而後工之文人嘅氣概有好大分別。
得利希慎基金贊助，牛津出版社費大氣力搜集高伯雨先生之作品，結集成「聽雨樓隨筆」，共十冊，至今已出版了八冊，要讀晒，需要唔少時間，但將八冊放在書架，隨時翻閱，隨意讀一篇，都幾過癮。例如呢日隨手揭開第三冊第270頁講蔡元培遺產，左丁山睇完開懷大笑，增進消化系統功能。高先生呢篇講蔡元培的遺產，蔡元培係五四運動名人，北京大學校長，現代中國學生運動以五四為始，學界中人講起現代最偉大大學校長，必稱蔡元培。據高先生所寫，蔡元培於一九四○年三月五日在港逝世，蔡夫人委託某君見羅文錦律師（羅德丞之父親），羅律師係當時最出名之華人律師，等閒人物見唔到羅律師，某君必定有番咁上下。羅律師聽見蔡元培死了，要辦理遺產，用英文問：「AGeneral?」某君答：「唔係，係中央研究院院長！」羅律師問：「遺產有幾多？」答：「六千港元存在滙豐。」羅律師說：「六千元，不必辦理遺產稅。」
羅律師大概以為蔡元培係政要人物，家財鉅萬，有好多錢，多數係將軍啦，故有此一問：「AGeneral?」由此可見，當年國民黨治國，貪污風氣甚盛，又以將軍斂財出晒名，令香港人（羅文錦）印象深刻。中國貪污之風，頗有懷舊意味，千年不變，於今為烈，英國傳媒指薄熙來谷開來二人指令海伍德偷運財富到海外，總數達60億之鉅，簡直嚇死人，如羅文錦再生，唔知會唔會以為薄熙來係「AGeneral?」呢。偶讀「聽雨樓隨筆」，甚有得益，如左丁山不學無術之流，視「聽雨樓隨筆」為營養維他命，不時吸收吓，誰曰不宜！