私駕路：跑車廿萬有找　鴛鴦門

「雙門跑車型係型，但唔夠實用，好難買得落手啫！」凡事無絕對，好像韓國Hyundai就推出「三門」跑車Veloster，結合跑車外形、房車空間再加揭背車實用性，唔買，看來要想過第二個藉口吧！

記者：李鑒泉
攝影：蔡家輝
Model：Alia@PureModels

一加二等於破格三門

男人對雙門跑車的執着，幾乎達到偏執的程度。不過當真金白銀買車時，身邊總有人批評雙門跑車唔實用兼保險貴，最怕就聽到「根本就係趕絕外母！」等說話，加上同類選擇屈指可數，結果好多人惟有乖乖「科水」買房車或七人車，你情我不願。幸好雙門跑車近年捲土重來，韓國現代亦乘搭順風車，於07年首爾車展展示Veloster破格概念車，去年更正式生產這款集跑車及揭背車於一身的「三門」跑車。
所謂「三門」，指的是三扇車門設計：司機位有一扇門，另一邊乘客席則有兩扇，後座車門門柄用上大熱的C柱設計，令車身感覺簡潔的同時，後座乘客出入車廂毋須再翻平前座，美觀又實用，車身外觀左右各有不同味道。定位為跑車的Veloster，誇張的巨型輪拱、接近揭背車的車尾設計，外形比德國對手更辛辣。至於鬼面罩則採用家族設計，包括六角形兩段式鬼面罩、回力鏢狀的頭燈連LED日光燈組等。代理更為新車追加與車身同色軨蓋的18吋五輻式輪圈，造型更Young。

右一門
■右邊車身屬單門設計。

左二門
■左邊除了前乘客席的車門，後座車門門柄，隱藏在C柱，讓人誤以為是單門設計。

■三門設計結合跑車、房車及揭背車的優點於一身。

集跑車房車揭背優點

雙門跑車後座聊勝於無向來遭人詬病，但在Veloster，後排座椅不但承托力足，腳部更有足夠伸展空間，雖然與大房車無得比，但卻不輸同級雙門跑車。此外，巨大尾箱的收納空間，擺放數件行李綽綽有餘，翻平後座後更可擺放單車。Veloster另一好玩之處，在於它的七吋TFT輕觸式屏幕，可選擇三種顏色之餘，又可以藍芽連接電話播歌、打電話等，而且，螢幕還可接到追加的後泊鏡頭，泊車夠方便。
Veloster採用1.6公升直四GDI引擎，能輸出140匹馬力，雖然馬力較細，但卻可踩盡油飛馳，大部份時間轉針都在1,500rpm左右，但將波棍撥到SMode，轉數急升至3,000餘轉，加速及轉波反應更敏捷，配合六速軚盤撥片，力量隨傳隨到，短車身設計讓入彎如魚得水。想慳油則可啟動ECO模式，電腦會控制波箱及油門反應達致節能效果，不過一定程度犧牲駕駛樂趣，魚與熊掌不能兼得嘛。車價廿萬有找就有齊跑車、房車和揭背車種種優點，夫復何求！但人總是貪心的，如果代理未來引入馬力逾200匹的Turbo版那就完美了！