無綫喺2005年起舉辦「香港先生」，到去年為止已連續搞咗七年，個選舉一直都大受女性歡迎，泳褲環節亦令唔少女性非常期待，不過有傳今年無綫決定暫停搞香港先生一年，噚日無綫製作總監余詠珊接受電台訪問時就承認呢件事。
余詠珊話，今次決定停辦一年係想諗清楚香港先生未來嘅方向：「咁多年都做到社會好多反應，唔知今年做高啲定低啲好，令佢更加爆炸同a富娛樂性定係高雅啲嘅感覺。」
消防員最型
余詠珊又話做有關男人嘅節目其實唔簡單，如果搵唔到個平衡點，咁就會做得唔好睇。原來余詠珊過檔到無綫冇耐就決定暫停搞香港先生一年，反而佢想搞競選紀律部隊先生，佢話：「都會幾英雄故事，有次我同紀律部隊傾開，佢哋以為我講笑，但我用人格擔保，選完市民會更加愛紀律部隊，人哋唔明我講乜亦唔信我，但我覺得男人最型係消防員，所以一直都會游說佢哋。」
另外，余詠珊話今年無綫會搞個大型嘅台前幕後招募活動，對於王維基都打算搞訓練班，余詠珊話各有各做：「我強項係訓練新人，自己仔女滿天下，未知會唔會叫有線主播，總之心理壓力好大，TVB亦都有我訓練出嚟嘅人，可以搵都會搵。」