汪詩詩和李樂詩前晚結伴到金鐘欣賞時裝騷，詩詩雖然有個「宇宙最強」老公甄子丹，但她卻抱怨子丹經常忙拍戲而忽略了家人，她還說一對子女連爸爸都不認得。反而腹大便便的李樂詩，仍不停與老公周圍飛去旅行，大晒恩愛。
汪詩詩和李樂詩前晚在太古廣場出席Chloé春夏時裝匯演，穿露背新裝的模特兒Jocelyn率領一眾模特兒行catwalk。早前詩詩生日，老公甄子丹為她送上驚喜派對，她冧爆說：「老公已經有幾年冇陪我過生日，難得今年佢抽到時間，終於可以全日留畀我。」
詩詩透露子丹平時好浪漫，試過親自下廚煮龍蝦餐，可惜此情難再，她無奈地說：「感覺好遙遠，其實家我都唔使要乜禮物，只希望佢能夠抽多啲時間陪我。」
希望一家旅行
近年甄子丹電影接不停，詩詩指一對子女試過唔認得爸爸，她說：「有次子丹返屋企瞓覺，小朋友見到有個好厚嘅背影嚇到好驚，佢哋奇怪點解屋企多咗個人，即刻去搵家傭問媽咪去咗邊。」
詩詩抱怨子丹太少時間陪家人，希望今年夏天能抽時間一家人去旅行，她說：「佢好煩，每次見我都係講電影，都要提醒佢多啲。但如果佢喺香港拍嘢，我都會抽時間去探班。」
李樂詩晒幸福
另外，懷孕五個月的李樂詩表示已照超聲波，知道腹中BB是男仔，她說：「但有時會遮住咗，所以未係好清楚。」李樂詩說現在僅重了六磅，所以行動自如，早前還陪老公到土耳其公幹兼旅行，稍後會再去夏威夷，她說：「今次冇懷第一胎時咁好精力，可能要湊住大仔，但都打算6月再去夏威夷，因為嗰度係我同老公結婚嘅地方，希望去懷念一吓新婚感覺。」
採訪：張俊銘 攝影：黃文偉