人才一定值錢，但能力又未必同金錢掛鈎。好似今次特首選舉唐唐大戰狼振英，唐唐請咗一班公關大將花咗近200萬元，位位超級巨星，平均收20幾萬，咁又點？咪爆出一次又一次嘅公關大災難。反觀事前個個唔睇好嘅狼振英，聘請黃麗君Fanny出任主管嘅公關公司GolinHarris（GH），盛惠18萬元，贏埋特首個位。八方翻舊賬，Fanny於07年曾幫煲呔連任特首，當時收15萬，事隔五年，都只係加價3萬蚊，難怪有人話Fanny抵請，刻苦耐勞可以媲美狼振英個穿膠花紮腳媽媽。
根據梁振英選舉開支文件，GH幫CY提供選舉宣傳策略、回應傳媒，以及選舉日嘅安排，都唔少嘢做喎。有業內人士都話，Fanny屬星級公關，18萬元呢個價絕對係抵！
酌量加價三萬蚊
八方睇返07年當年當選連任特首嘅曾蔭權選舉開支，Fanny都有幫拖，以公司名義收取15萬元諮詢費，五年後幫狼振英，都只係酌量加3萬蚊，加幅大約係20％，真係齋計通脹，都唔止呢個數啦。反而兩度為曾蔭權助選嘅公關顧問游淑儀，07年就收取50萬元嘅公關費。
江湖傳聞Fanny稍後可能加入狼振英班底，做特首辦新聞統籌專員，因此以筍價助選。問題係Fanny日後收入勢大打折扣，未必捨得咁話。
另外，狼振英申報開支文件又顯示，好多闊佬睇定咗，3月先「補飛」捐款畀狼振英，郭炳湘更加遲至4月先「科水」。據知情人士稱，其實郭炳湘2月表態支持CY，3月初已送上50萬元支票以示「心意」，唔知點解梁營4月先入數。咁人哋均真，交到貨先收錢，唔得咩！
mailto:[email protected]