在裝修行業三十多年，經手的住宅多不勝數，當中有不少名人、富豪。這行見盡名人百態，好多人表裏不一，當然亦不乏有情有義，例如劉德華，行善低調，在報章睇見的善舉不及百分一。
我裝修過的富豪大宅，見盡行為古怪的人，其中一次經歷，不能話佢有錯，只能說「好激」。話說那天如常工作到傍晚，準備洗手收工，老闆一早講過不可以用主人房洗手間，只可用工人廁所梳洗，但當日有十幾人開工，其中一個師傅趕時間，入咗主人房廁所，開浴缸水喉洗手，咁啱個客上來，撞到正，佢企喺師傅後面，但無出聲，從手袋拎出相機，卡嚓一聲，師傅俾閃光燈驚醒，連忙道歉，而個客不發一聲就離開。
老闆知道今次大件事，但收工時間，聽日先算。第二朝返到地盤無耐，老闆同測師、客人一齊入屋，直入主人房廁所，老闆拎起個大鐵鎚，狠狠將全新的按摩浴缸打碎，客人仲好有禮貌咁，向住班師傅講辛苦晒，之後離開。老闆就同我哋講：唔使換衫，收工啦，冇得做啦，全部炒晒！
後來老闆話，客人要測師睇住，證明浴缸係老闆自己打爛，一定要佢賠。個肇事師傅仲差十幾日糧，都唔夠膽叫老闆出。裝修佬華哥
本欄園地公開，歡迎各界來信，以450字為限，請電郵至mailto:[email protected]，註明《家》樓民講場，請留聯絡電話。編輯保留文章的刪減權。