經歷了龔如心與陳振聰風水結緣事件，大家才明白到，現實比小說和電視劇更離奇，誰再敢說那些肥皂劇的情節沒有說服力？再沒有可能，再毫無邏輯可言的都發生了，大家只好默然無語，因為怎樣也解釋不來，正所謂講都冇人信。
饒是如此，當我睇住兩場歐聯4強大戰次回合，我到現在還是接受不了目前這個賽果。誰能在事前夠膽買重注賭決賽會由拜仁對車仔，我寫夠10個服字。我一直睇好，甚至是期盼住，相信大家也是同一陣線地認為，有乜可能唔係巴塞對皇馬？
睇住巴塞主場對車仔，巴塞可以領先兩球，泰利發神經攞紅牌，車仔仲要踢少個人，可以喺完上半場入到波，下半場美斯個12碼會撞楣唔入，連成季都毫無表現，大家都在懷疑佢係咪真係值5,000萬鎊轉會費的王子費托，竟然在補時階段入多粒，兩回合贏3:2。連英國《每日郵報》都大字標題話費托finallyscore（終於入波）！大家都話咁嘅劇本，咁嘅過程，咁嘅結果，邊個寫得出？
都未算，第二晚拜仁對皇馬，我夠膽瞓身買拜仁的話，肯定已經變做富婆，上回合拜仁主場2:1領先，下回係皇馬主場又踢成2:1，搞到要射12碼分勝負，呢個時候，邊個會認為C朗同卡卡會唔入吖，唔該去嗰邊驗尿？我梗係記得94年嘅巴治奧，佢射唔入嗰球12碼，連隻世界盃都拱手讓咗畀巴西，但係呢場只係歐聯，一年一度，唔係四年一度世界盃喎，唔使咁戲劇性啩！
既然戲劇性到一個點都估唔到佢哋點，我索性希望歐聯決賽會係咁發生，拜仁發夢都希望可以咁啱得咁蹺，可以喺主場贏取歐聯錦標，偏偏失諸交臂，車仔因此死好命保住下季踢歐聯的資格，令到英超只得前3可以踢歐聯，而阿仙奴、熱剌同紐卡素嘅第3席位之爭就變得更精采，呢鋪咪真係牽一髮動全身囉！