蘋機會：靚佬湯搵命博　喪爬杜拜塔

蘋機會：靚佬湯搵命博　喪爬杜拜塔

「登，登，登凳！」每當聽到這首經典主題音樂，就知道又是荷李活型男湯告魯斯的《職業特工隊》出場，第四集《鬼影約章》剛推出了Blu-ray及DVD，除了正到爆燈的有型特務場面，還有炸冧俄羅斯克里姆林宮，以至罕有能在全球最高的杜拜哈利法塔取景，都屬本片不能錯過的必睇場面。

撰文：佐馬介

或成湯版最後《MI》

近年經歷事業谷底的靚佬湯，終憑去年底《MI4》人氣反彈，可見他搏到盡的演出並沒白費。故事講述靚佬湯飾演的超級特工伊頓，為調查核戰危機一事，在俄國竟遭到陷害，成為炸毀克里姆林宮的罪人。美國政府棄車保帥啟動「鬼影約章」拒絕認賬，令伊頓小隊要在毫無支援下還自己清白，走遍世界各地包括中東杜拜和印度孟買等，向一對實力非凡的罪犯進行大反擊。
猶記得靚佬湯拍攝上集《MI3》時，因曾做出過激行為，導致同電影公司關係破裂冇偈傾，幕後欲另找《拆彈雄心》男星謝諾美維納取代之，結果為求順利過渡，先讓他跟靚佬湯合作，下集才由謝諾美擔正。為保自己地位，靚佬湯親身上陣包辦多個驚險動作場面，尤其是超人般的在哈利法塔外圍奔跑，難度極高，以求爭取籌碼繼續孭飛！

■謝諾美維納飾演的特工身手不凡，卻暗藏不可告人秘密。

■菜單畫面充滿動感，音樂和氣氛富有《MI》招牌觀感。

■英俊兼型爆的特工靚佬湯，當然總會有性感迷人女伴出現左右。

■靚佬湯威也綁腰停留在哈利法塔外圍，可謂藝高人膽大。

超班特技逐格睇

除驚天動地的鬥智鬥力橋，每集搵命博的場口亦屢成影壇經典，《MI4》某程度是過往幾集名場面大集會，製作花絮中便見湯在高逾二千呎的哈利法塔半天吊，又得繞塔身狂走，儘管綁上威也，但克服畏高症兼不擔心意外，以其卡士而言確非常難得。而在Blu-ray碟中，由高處往下望的畫面非常清楚細緻，街上景物和玻璃倒影皆一目了然，畫質完全收貨，沒看花絮根本就無法察覺拍攝奧妙之處。另一個必睇位，乃克里姆林宮被炸一幕，原來劇組只在捷克首都布拉格取景，在藍幕協助下把東歐名城變做莫斯科，大爆炸時原來所有背景都是畫上去的。
本作的Blu-ray版設有雙碟版及雙碟鐵盒版，兩者皆有大量拍攝秘辛和近10分鐘刪剪片段，此外亦同時推出收錄全系列共四集的BoxSet，但每集只有單碟，想儲Makingof的朋友必須注意。

■縱使腰間纏上威也，靚佬湯這場哈利法塔驚險戲絕無取巧，百分百親身上陣。

■藍幕左方原本空無一物，但在電影中則變成克里姆林宮。

《職業特工隊：鬼影約章》$268
（雙碟版Blu-ray）$298
（雙碟鐵盒版Blu-ray）$148（DVD）

■普通版兩隻碟均只用白底黑字而非彩色圖案印刷，略嫌失望。