38歲的姚樂怡昨日與同齡的商人男友Alan舉行婚禮，穿上低胸婚紗的新娘艷光四射，更與新郎連咀幾次。提起早上接新娘，姚樂怡笑言激辣姊妹湯盈盈玩謝老公和兄弟團，以牛皮膠紙黐腳毛、腋毛及胸毛，再把黐滿體毛的膠紙封新郎的嘴，認真狼胎！
近年暫別娛圈、轉戰公關界的姚樂怡，昨日與圈外男友吳俊匡（Alan）結束8年愛情長跑，在尖沙嘴RitzCarlton酒店舉行婚宴。傍晚時份，姚樂怡穿上低V拖尾婚紗切蛋糕，新人煙韌地親嘴三、四次。
昨日出動十男十女兄弟、姊妹團，姊妹團包括佘詩曼、湯盈盈、梁靖琪、周家蔚、關寶慧、張文慈和鍾麗淇等。早上接新娘時，新郎Alan及兄弟團被巴辣姊妹湯盈盈施酷刑，姚樂怡說：「湯盈盈好難應付，好激，佢好投入，佢用牛皮膠紙黐兄弟腳毛，本來想黐埋新郎，但見新郎冇腳毛，轉黐腋毛再貼口，佢發現有啲兄弟心口有毛，連胸毛都唔放過。」
盈盈狼胎玩新郎
黐完兄弟體毛，湯盈盈又要新郎凌空拿取貼在牆上的照片，新郎為免被罰，不惜伸脷來取，才成功取得老婆的靚相。一對新人異口同聲誓言：「湯盈盈結婚一定報仇！」並謂晚上婚宴時要盡快隊醉湯盈盈。
昨晚婚宴有不少圈中人出席，包括大肚婆文頌嫻、阮兆祥與女友、吳國敬、方中信和曾志偉等，志偉笑晒說：「好似嫁女咁開心，見到佢哋嫁得咁好，好安樂。」
不設防講明恨B
姚樂怡表示很感激姊妹團在婚前陪她到台灣玩了三日，有沒有婚前最後一擊幫襯牛郎店？她說：「冇，佘詩曼都有份去，好多人認得，我哋以食為主。」
婚後兩人不設防，隨時迎接小生命來臨，姚樂怡說：「一路好想有，家仲未有，如果有咗，我怕興奮到未夠3個月就講出嚟。」一對新人先舉行婚禮，稍後出外度蜜月才進行註冊儀式，暫未決定地點，她說：「我哋希望喺美國拉斯維加斯註冊。」Alan雖然在荷蘭土生土長，但屋企是圍村人，一對新人後日再在元朗圍村擺一百圍盤菜婚宴，到時她會穿裙褂和坐轎。
採訪：何慧斯
攝影：陳俊強
