懷 舊 - 左丁山

懷 舊 - 左丁山

幾日前睇到一篇專欄,寫得好有趣,大意係講今天的中坑懷舊早餐,係買一份報紙,到老式茶樓(市面上已經好少有)飲茶,一盅兩件,或者到大牌檔(又係好少有)叫杯奶茶食多士;至於老坑懷舊,就係捧一籠雀到茶居,食番個叉燒包。
似乎有幾多人鍾意懷舊,大概香港人已經老化,四十五至五十五歲人口佔七百零七萬人口嘅最大比例,人到中年,加上荷包有錢之後,就懷念小時候跟爸爸到茶樓嘅時光,其實自己當年好唔情願,話老頭子老套,唔去幫襯KFC或麥當勞(此兩快餐店在七十年代末及八十年代初在港開業,今天五十歲人士,嗰陣未到二十歲)。
懷舊呢味嘢,左丁山唔會認同。舊事物,除咗舊文章、舊著作(如錢唐牟三位大師在港出版之著作)或者高伯雨之「聽雨樓隨筆」等等外,有乜好懷念?左丁山絕對唔懷念睡在冷巷碌架床上格,與「同屋住」爭廁所,被逼要晨早跑落麥花臣球場臭味攻鼻嘅公廁嘅舊日子,或者在醉瓊樓食學生飯(豆腐斑腩飯)嘅時光,啲飯好難食啫,故此大學畢業搵到第一份工之後,至今未再去過醉瓊樓。好多今天之所謂老字號,當年不值一哂,如果今天仍是沒有進步的話,執咗好過啦。有一間不懷念過去,大力改進,追上二十一世紀經營手法嘅,就係六十年代上海街一間老套嫁女餅餅家,啲餅好難食,見到就怕。點知後人真係幾叻,搵到靳隸強設計新形象品牌包裝,造餅技術大革新,今天老而彌堅屹立不倒,成為香港名牌,啲芝麻餅、光酥餅都唔知幾好味,呢間就係「奇華餅家」,能與時俱進,好值得讚。比較之下,嗰啲死攬住過去,不知進步只懂埋怨租貴、人工貴、生意難做之所謂老店,奇華高出幾皮。
懷舊要適可而止,唔係舊店舊事就是好,過份懷舊根本不知進步為何物,給人家拋在後頭,唔好怨天怨地呀。今日年青人早上吃早餐就係到大家樂、大快活排隊,左丁山梗係唔制,但下一代行為如此,怎可以阻止?茶居愈嚟愈少,快餐店愈來愈多,乃大勢所趨,懷乜鬼舊吖。