中韓混血的無綫藝人宋芝齡，密密秘撈創業，繼早前在銅鑼灣渣甸街開辦韓語學校、韓風婚紗攝影公司後，最近又在同一條街搞韓式小食店，因為最低工資難請人，她親自看舖任廚師兼送外賣一腳踢，I.T.男友放工即落舖幫手洗碗，兩人一條心努力賺老婆本。
宋芝齡與任職I.T.界的男友感情穩定，最近兩人在銅鑼灣渣甸街一間只得百餘呎的小舖夾份開韓式小食店，舖仔細細，但月租近十萬，相當乸脷，為求盡快開業賺錢交租，未正式開張門外招牌仍貼着紅紙，也要趕着開舖做生意。由於最低工資難請人，靚女老闆娘只好親自落舖工作。
吸引老外幫襯
本周二傍晚六時正值放工時間，店舖人流不絕，老闆娘宋芝齡做到冇停手，不停為顧客煮食，有外籍人士要求試食，她又要忙着招呼及介紹，除了落手落腳充當廚師外，更要急急腳往送外賣。她返回店舖時，又再堆滿幫襯人群，期間有學生認出她要求拍照留念，她雖然做到滿頭大汗，但也隨和地答應拍照。
直到晚上七時，宋芝齡的I.T.男友放工後，第一時間趕落舖頭幫手，他即時除下西裝外套及放下公事包，開工送外賣、收銀及洗碗，兩人一條心拍檔搵銀。
一街連開三舖
宋芝齡繼在渣甸街開辦韓語學校、韓風婚紗攝影公司，最近又在渣甸街搞韓國小食店，一條街內佔據三間不同類型店舖，認真巴閉，記者笑她是否中了六合彩？宋芝齡表示：「其實係屋企人投資，我同男友只係夾少少玩吓，將賺番嚟嘅錢，投資再投資，睇吓幾時可以退休，今日咁啱有個員工休息，男友咪要落嚟幫手，大家一齊努力。」問到何時結婚？她說：「暫時唔諗住。」
採訪：林妃
攝影：仇志德