仲講巴塞同皇馬？我求大俠已經將目光放喺下星期一嘅曼市打吡上面。大戰前夕，兩隊都有唔少搞作，好似曼城叫球迷一齊度橋sell波衫、腦殘兄弟玩影子分身，而曼聯就有拿尼訂婚，同埋費Sir搞旅行團減壓。
腦殘兄弟餅印新look
究竟邊個係巴洛迪利？答案兩個都係，左邊係我哋熟識嘅曼城前鋒巴洛迪利，右邊係佢細佬以諾巴洛迪利（EnochBalotelli）。可能知大佬呢排受唔少氣，又俾人罰停賽，以諾決定用行動支持佢，由一頭黃髮到衫褲鞋襪都着到同大佬一模一樣，真係兄弟同心！我求大俠希望大佬趁呢排停賽反省吓，以後做個好榜樣畀細佬睇。
另外，曼城呼籲球迷齊齊諗橋拍片sell下季波衫。若果條橋被揀中，曼城會畀支專業嘅攝影團隊幫你去拍，完成後仲會公開放映。
另一邊廂，恭喜拿尼！呢位25歲曼聯翼鋒宣佈，佢將會同女友訂婚。佢女友叫馬汀絲，係葡萄牙同安哥拉嘅混血兒，??家做緊記者。佢哋拍咗拖4年，可能見時機成熟，就決定訂婚，拿尼仲喺twitter公佈呢個消息。開心事值得畀全世界知嘅，就連領隊費格遜都老懷安慰，佢向來支持球員成家立室，話咁樣會定性啲，唔會周圍去玩，可以專心踢波
費Sir帶隊卡城打Golf
費Sir表面惡死，內裏係好關心班球員。好似曼聯上場同愛華頓踢成4:4，佢見到班球員心情緊張，擔心下周一嘅曼市打吡，所以呢個星期四，佢就帶成班球員南下卡迪夫嘅度假村唞吓，畀啲球員打高爾夫球同做spa；另外費Sir仲同卡迪夫城傾掂數，曼聯可以用佢哋嘅訓練設施，畀班球員去健身同踢波。其實，費Sir帶隊去旅行都唔係第一次，上月尾佢安排過球隊去蘇格蘭度假；佢解釋，旅行唔單止舒緩比賽壓力，仲可以令球員間更有默契。果然，去完上次旅行後，曼聯就連贏布力般同昆士柏流浪，唔知呢次卡迪夫之旅又有冇效呢？