梁振英還未上任，講兩句已經震散兩件大事，一件係雙非孕婦，令私立醫院及婦產科醫生前途不明，另一件就係皇帝唔急太監急，立法會議員爭相揣摩上意，喝停垃圾焚化爐。左丁山與獅子山學會行政總監亞皮蛋王講起：「唔，睇嚟未來十年，你地個學會等執都得咯，梁先生要有為，要小市場大政府，要干預，全部與獅子山學會理念背道而馳，以後仲邊度有人聽你地枝笛呀？」皮蛋王仍然信心十足咁話：「好多人善忘嘅啫，到梁先生真的干預到底嘅時候，市民就會發出不同聲音，我地堅持『小政府、大市場』嘅原則到底！」後來皮蛋王上香港電台「自由風」節目講私立醫院，俾一位聽眾破口大罵，左丁山一時聽唔明，事後問皮蛋王：「點解俾人鬧？」皮蛋王曰：「我話私立醫院不應該受太多管制，公立醫院大晒，醫療絕對倚賴公立醫院，對市民並非好事，嗰位聽眾聽唔入耳，話我不顧病人福利喎。其實我在加拿大讀書生活一段時間，加拿大醫院全部公營，不准私營，人民要施手術，排隊排好耐，一位省長及好多有錢人，遇到外科急事，索性飛落美國求醫，一啲香港移民就飛返香港入院檢查，故此公立醫療部門太大，具壟斷性嘅話，並非好事！」
由醫療講到領匯加租，皮蛋王為證明部份人士善忘，上網搜尋到一啲報道，傳俾左丁山睇吓，例如有一段：「房委毒瘤須切除 市值租金要堅持。領匯的加租續約風波持續擴大，商戶、議員紛紛走出來抗爭。但是，此次領匯與公共屋邨商場店舖租戶之間的博弈，卻揭發出香港社會一個大黑洞：幾十年來，在房委會的經營下，因循守舊的續租機制，導致公共屋邨商場店舖出現大量『租上租』情況，房委會租金與市場租金的差價，被中間人坐地分肥吞掉，房委會損失嚴重。領匯上市後，按市場規律改革公屋商場店舖租務，不可能再容許這類中間剝削的陋習，實際經營者如果要正式成為租客，必須循正途向領匯繳付市值租金，這才是正本清源之道。」
咦，鼓吹領匯收取市值租金，令人耳目一新，邊個講㗎，就係《明報》於2007年3月9日嘅偵查報道。