這個世代，英雄無用，今日風光，有「雖千萬人，吾往矣」嘅氣魄，他朝失意可能被打成狗熊。體育運動迷對成敗得失多有這種體會，冇得輸唔起，今季唔得咪等下屆，最緊要未離開賭枱。英超英冠兩個3哥今晚同日出場，呢兩個小三冇份爭冠軍，但巨獎當前鬥志仍強；比較下韋斯咸更值博，推介半勝、半大加半場波膽，望中咗先攻完場後開波嘅英超。
王者美斯同C朗射失12碼頓成狗熊，結果歐聯換來「拜車戰」；車仔神奇殺入歐聯決賽，相信本港各路英超躉多團結起來，為佢哋打氣。今屆嘅歐洲波，上風嗰隊多死，下月到主場嘅拜仁大熱；睇吓車仔會唔會再創奇蹟。其實車仔冇咗幾件中後場主將唔係太大問題，只要氣勢仍在，神奇會繼續。對拜仁啫，斷估都唔使用到鐵桶陣啩？
車仔今屆仲叫緊3飛，但鄰會阿仙奴只剩爭3哥位，佢哋嘅王牌尹佩斯剛膺英雙料足球先生；來屆續效與否，乃屬後話，幫球會達標喺風雨中嘅一季算是收貨。不過近排已見啞火嘅佢，年近29吓吓做單箭頭喺前線死衝，更易走下坡，可以預期，今季中段瘋狂入波做咗球會英雄，他朝好快會成被遺忘的人；仲值二、三千萬鎊轉會費去到意、西可簽多5年，真係應該咪阻人發達，畢竟足球員風光可以好短暫。
阿仙奴最值加人工挽留嘅係屆屆進步嘅桑治，最唔應該下屆收番賓特拿同丹尼遜自找麻煩。今晚兵工廠出鬥中游史篤城，又有禾仔同阿迪達兩件主力提早收「咧」；面對今季主場對強隊未輸過嘅史篤城，客W只能感情票小注，都係嗰句，估中韋斯咸先講。
今日本欄獨貼一場，拆局係只要修咸頓同日贏篤定降班嘅高雲地利，韋斯咸大勝作客嘅侯城10球都無用，只能以第3踢季尾升班附加賽；不過估計以韋斯咸季尾嘅氣勢同攻力，上半場必定瘋狂進攻望先收窄與修頓嘅得失球。翻查近5季英冠第3名，最終有3隊可趕上尾班車，今日就算力追修咸頓失敗，未算壞事。上半場入球中位數1.5球，更覺值博。
上月擂台靠最後貼英冠全中，賺22%封王；今天未計周六投注，仍負5、6%，仲有數天，會努力追趕前列，冧莊失敗，起碼曾認真努力過。下次見報(5/5)
文：蘋果波神
今日重心推介
首選：韋斯咸半勝(1.85)
次選：韋斯咸半場大(2.5)