愛情路上有人以結婚為目標，有人覺得一紙婚書沒甚麼大不了，又有人不停在愛情路上尋尋覓覓。無綫節目《三個女人一個墟》主持呂慧儀、蒙嘉慧和卓韻芝，一個已婚，一個拍拖多年不恨嫁，一個在愛情路上兜轉，三人對愛情和婚姻都有不同看法，但前提都是一樣─女性要活得豐盛。撰文：李珮洳
香港人現在會將30歲以上，未結婚未有男友的女性，冠上剩女之名。但是，有誰規定女人一定要結婚生仔，甚至一定要拍拖呢？蒙嘉慧（YoYo）強調自己絕不是剩女，她日前說：「點解要係剩女先？邊個話人生唔可以一個人？唔通你18歲結過婚，28歲喪偶，咁都叫有人要過呀，咁又叫剩女呀？做人最緊要過得開心，只係睇你幾時遇到，就算叫都係叫盛女。」當然YoYo絕對不是剩女，與男友鄭伊健拍拖多年，只欠一紙婚書，兩人關係早已猶如夫妻。
蒙嘉慧最憎催婚
剛與黃文迪（Dickson）結婚的長腳蟹呂慧儀提起剩女話題特別口響，她說：「一定要用豐盛個盛，有冇另一半唔重要，我有朋友結完婚離婚咁又點呀。做女人一定要喺自己最豐盛嘅時候，做到晒自己想做、令自己開心嘅事。」
仍然在愛情路上尋覓Mr.Right的卓韻芝，似乎是三人之中，最接近剩女的一位，當然她都是選擇做豐盛的盛女，她說：「每個人都要知道自己有marketvalue，只要人生豐盛，唔理你係10歲定係70歲，好似我阿婆咁，去搵自己嘅價值，個人自然會靚。」
講完盛女講人生大事，YoYo與伊健仍未打算結婚，YoYo說：「我覺得我哋進行得好OK，家好開心。結婚唔係一個需要，開心就足夠，我有個律師朋友，只要我哋換件衫打個電話，兩個鐘都可以搞掂呢件事，反而大家成日問我就越唔想結。」若伊健求婚會如何反應？YoYo淡淡然說：「求婚咪結囉，但唔係呢個時候。」
榮升黃太的呂慧儀表面看來是食住另一半，事實上提起老公時，長腳蟹不自覺泛起微笑。YoYo更踢爆結婚是呂慧儀提出的，呂慧儀哈哈大笑後說：「件事係咁㗎，有次去完朋友婚禮，好多人問幾時到我，我返去咪同佢講年尾結婚囉。當時Dickson嘅反應係『吓！好呀，但我未求婚喎。』」原來呂慧儀當時抱着「講完就算」的心態，沒想過Dickson真的籌備婚事。
阿芝要仔唔要公
阿芝曾經與音樂人陳輝陽拍拖，之後戀上金融才俊Joey，接着是樂隊Mr.成員MJ，然後再到兩個不同國籍的外國人，卓韻芝的戀愛經驗應該不只如此吧。外界又會覺得她有點「濫」，阿芝對此打了一個比喻：「一個森林咁多棵樹，你都要行埋去唔同嘅樹前面睇清楚自己鍾意邊棵㗎，企喺個森林出面你咪睇得嗰幾棵囉。」她強調性格保守，絕不輕易與人發生親密關係。「婚唔一定要結，仔我一定要生，我要生好多好多個，香港家唔夠香港人呀，我要生多啲出嚟保衞地球。」
化妝：Will、Micky（suchagood...）
服裝提供：Vaudeville&Burlesque
髮型：Coren（Hair）、ZiggieLo（Lamodsalon）
