巴塞中堅碧基（倒地者）喺周二歐聯4強次回合上半場，掛住實杜奧巴，無為意隊友域陀華迪斯跳起接波，個頭就撞埋去域陀華迪斯個盆骨位，結果暈得一陣陣。碧基經過治理後好似冇咩事，點知踢多8分鐘，佢向場邊示意頂唔順，由丹尼爾入替，而碧基被送院檢查。巴塞官方賽後表示，碧基有輕微腦震盪，冇咩大礙，但穩陣起見，都要留院觀察一晚。