被喻為顧嘉煇接班人嘅36歲新一代無綫音樂總監鄧智偉，5月喺九展舉行兩場名為《平行回憶演唱會》嘅作品展，仲搵咗無綫嘅林峯、黃宗澤、吳卓羲同許廷鏗群星拱照，唔知係咪佢張宣傳海報用自己大頭做主相，加埋佢仲chok過林峯嘅造型嚇親觀眾，聽講賣飛情況唔係好樂觀。喺Groupon嘅網仲有團購優惠，兩張總值800蚊嘅門票都只係要399蚊仲加送海報一張，擺明買一送一都吸引咗過百人訂購。
彈海報勁Chok
去年傳出向樂易玲篤鄧智偉背脊而被炒嘅周永恆（Roy），噚日接受電話訪問，佢聽到鄧智偉門票團購變相半價嘅時候，佢語帶雙關話好合理：「電視機有得免費睇同聽，佢作親啲歌全部都免費聽，你要消費者俾錢去聽，係會差少少，你喺無綫搞個騷就冇所謂，所以係正常嘅，唔係針對佢，而且黃宗澤、吳卓羲都係拍嘢，唱歌唔係佢哋最擅長，最勁都係林峯啫，佢又啱啱開完演唱會。」
Roy講明唔會買飛捧場，佢仲話好多年冇畀錢睇演唱會，就算有免費飛都冇興趣喎，佢又話張海報勁chok：「對佢個人都冇興趣啦，之前冇興趣先唔撈，仲要搞到咁麻煩，睇佢嚟做乜鬼，呢個人以前對我傷害都幾大，費事再有乜嘢接觸。」