利物浦今季令球迷好失望，但兩位曾經效力紅軍嘅球員前晚就威到爆。費托幫車仔攞到今季歐聯決賽入場券，佢嘅前紅軍隊友尼高治亦做咗英雄；喺作客阿士東維拉場英超護級戰射入致勝球，協助保頓贏2:1，搶得寶貴3分，兼且將維拉拖埋落水，齊齊護級。
尼高治奠勝贏維拉2:1
今季英超，榜尾仲刺激過榜首。狼隊星期日主場輸畀曼城0:2後，正式宣佈死亡，令降班位得番兩個；昆士柏流浪（QPR）、韋根、布力般流浪同埋保頓，都有機會同狼隊一齊喺下季落英冠比賽。前晚，保頓就作客維拉，呢3分對佢哋好重要，結果亦冇令球迷失望，由馬田柏杜夫同埋尼高治各入一粒，反勝2:1完場。
保頓攞到呢救命3分後，34戰得33分，喺聯賽榜由第19位微升一級上第18位；雖則比QPR同埋韋根少1分，不過就少打一場，所以護級前景都算樂觀。保頓領隊哥尼話：「我哋家陣打緊護級戰，所以呢3分真係非常重要。」保頓之後4場聯賽，其中有3場係對打風流波嘅新特蘭、西布朗同埋史篤城，唔怪得之哥尼好似鬼咁有信心啦！
麥利殊：命運在自己手！
但係，維拉主帥麥利殊就好頭痕喇。原本佢哋冇乜護級壓力，但近排係咁失分，對上13場聯賽，竟然只係贏得一場，攞到1勝6和6負；家雖然排喺第15位，不過只係多QPR同埋韋根兩分咁大把，所以你話麥利殊唔驚就假。麥利殊就咁話：「我哋嚟緊要為護級而戰，眼前仲有9分等緊我哋，因此命運掌握喺我哋自己手。」