海迪覺得無論做人、做事定做公司，Credibility真係好重要。我明白上市公司係想推銷自己，講說話有時避重就輕。但有啲情況係嚴重到管理層將A講成B，又或者刻意誤導投資者，咁呢啲無Credibility嘅公司，大家最多只會被你呃一次半次，以後想我翻兜？NoWay。
如某體育股，舊年收入只升5%，同佢原本公佈嘅訂貨會生意平均升20%，爭成條街。投資者問管理層係唔係cut咗定單呀？佢死口唔認，話只係運貨時間延遲咗！差距咁多，咁解釋都以為可以過到骨？你當投資者係儍仔？所以以後呢間公司公佈咩數據，無人理，股價零反應。邊個仲會信你先？
海迪想順帶提醒一下大家。體育股經常公佈嘅零售渠道庫銷比，呢個數係Off-balancesheet㗎，唔使經過audit，係公司自行向分銷商「理解」存貨情況後，自願公佈嘅數據。有體育股長期公佈嘅庫銷比數字同業績脗合，大家信公司有口齒，才會將這個數據列入參考。相反，間公司如果呃過你，海迪勸大家聽完就算，唔使咁認真。
海迪